Shumë persona provojnë mënyra të ndryshme për të humbur peshë dhe për t’u dukur sa më mirë. Kohët e fundit, një metodë shumë e përdorur, është vendosja e balonit gastrik. Baloni gastrik është një pajisje mjekësore e përkohshme që vendoset në stomak për të ndihmuar në humbjen e peshës. Gjithsesi kjo pajisje pas një periudhe 6 deri në 12 mujore duhet të hiqet. Heqja e balonit bëhet kur periudha e përdorimit ka mbaruar, ose nëse shfaqen komplikacione.

Çfarë është heqja e balonit gastrik?

Heqja e balonit gastrik është një procedurë që kryhet për të larguar balonin gastrik të vendosur më parë në stomak. Baloni gastrik është një pajisje e përkohshme, zakonisht e bërë prej silikoni, e cila vendoset në stomak për të reduktuar hapësirën e tij dhe për të krijuar një ndjenjë ngopjeje më të shpejtë. Kjo procedurë ndihmon pacientët që të hanë më pak dhe të humbin peshë.

Pse kryhet heqja e balonit gastrik?

Heqja e balonit gastrik kryhet për disa arsye të rëndësishme dhe të përcaktuara nga specialistët. Disa nga arsyet kryesore që çojnë në heqjen e tij, janë:

• Kufizimi i kohës së përdorimit: Baloni gastrik është një zgjidhje e përkohshme për humbjen e peshës, dhe zakonisht qëndron në stomak për një periudhë prej 6-12 muajsh. Pas kësaj periudhe, ai duhet të hiqet për të shmangur degradimin e materialit dhe komplikacionet që mund të ndodhin nëse lihet për një kohë më të gjatë në trup.
• Komplikacionet shëndetësore: Në disa raste, pacientët mund të përjetojnë efekte anësore si dispepsi, të vjella të shpeshta, dhimbje stomaku, ose ulçera gastrike për shkak të irritimit nga baloni. Këto simptoma kërkojnë heqjen e menjëhershme të tij për të shmangur përkeqësimin e gjendjes.
• Rrjedhja ose shpërthimi i balonit: Në raste të rralla, baloni mund të pësojë rrjedhje ose shpërthim, çka kërkon një ndërhyrje urgjente për ta larguar nga trupi. Kjo ndodh kur materiali i balonit degradohet ose dëmtohet për shkak të acidit gastrik.
• Ndryshimet në synimet e humbjes së peshës: Pas disa muajsh me balonin gastrik, disa pacientë mund të kenë arritur synimet e tyre për humbje peshe ose mund të mos jenë të kënaqur me rezultatet dhe të zgjedhin të heqin balonin për të vazhduar me trajtime të tjera për menaxhimin e peshës, si dietat ose kirurgjitë bariatrike.
• Planifikimi për procedura të tjera kirurgjikale: Baloni mund të jetë një zgjidhje e përkohshme para një kirurgjie më të madhe bariatrike (si bypass-i gastrik), dhe duhet të hiqet për t’i lënë rrugën procedurës së ardhshme.

Si kryhet heqja e balonit gastrik?

Heqja e balonit gastrik është një procedurë e ngjashme me vendosjen e tij. Ajo kryhet zakonisht në spital ose në një klinikë nga një gastroenterolog.

Ja si kryhet procedura:

• Sedacioni: Pacienti është nën sedacion të lehtë për ta ndihmuar të qëndrojë i qetë dhe të mos ndiejë dhimbje gjatë procedurës.
• Endoskopia: Një endoskop futet përmes gojës në stomak. Pasi baloni lokalizohet, një instrument përdoret për ta zbrazur balonin nga lëngu ose ajri që ka brenda.
• Heqja e balonit: Pasi baloni është zbrazur, ai nxirret nga stomaku nëpërmjet endoskopit.

Procedura zakonisht zgjat 20-30 minuta, dhe pacientët zakonisht largohen nga spitali pas disa orësh.

Kur aplikohet baloni gastrik?

Baloni gastrik aplikohet tek pacientët që kanë indeksin e masës trupore (BMI) mbi një nivel të caktuar, të cilët kanë provuar metoda të tjera të humbjes së peshës pa sukses. Ai përdoret si një zgjidhje afatshkurtër për të ndihmuar pacientët të humbasin peshë në mënyrë të shpejtë, shpesh para një operacioni më të madh për humbjen e peshës, si bypass-i gastrik. Baloni gastrik, mund të shoqërohet edhe nga ndërhyrje kirurgjikale sic mund të jenë abdominoplastika apo liposkulptura, në mënyrë që trupi të duket sa më mirë dhe më në formë pas humbjes së peshës.

Baloni gastrik: pasojat dhe efektet anësore të mundshme pas heqjes

• Rikthimi i peshës: Pas heqjes së balonit, nëse pacienti nuk ndjek një regjim strikt diete dhe aktiviteti fizik, ekziston rreziku i rikthimit të peshës.
• Efekte të përkohshme në stomak: Disa pacientë mund të përjetojnë dispepsi ose të përziera pas heqjes së balonit, por këto simptoma zakonisht kalojnë brenda disa ditësh.
• Nevoja për procedura të tjera: Në disa raste, pacientët mund të konsiderojnë trajtime të tjera më invazive për humbjen e peshës, si kirurgjia bariatrike, nëse baloni nuk ka dhënë rezultatet e pritura.

Baloni gastrik: Mite dhe fakte për heqjen e tij

Si çdo procedurë mjekësore, ekzistojnë mite dhe fakte të lidhura me heqjen e balonit gastrik. Më poshtë janë disa nga mitet më të zakonshme dhe faktet që ndihmojnë në qartësimin e kësaj procedure.

• Miti: Heqja e balonit gastrik është një procedurë e komplikuar dhe e rrezikshme
• Fakt: Heqja e balonit gastrik është një procedurë relativisht e thjeshtë dhe e sigurt.
• Miti: Pasi hiqet baloni gastrik, pesha e humbur rikthehet menjëherë
• Fakt: Kthimi i peshës varet nga stili i jetës së pacientit.
• Miti: Të gjithë duhet të heqin balonin gastrik pas 6 muajsh
• Fakt: Koha për heqjen e balonit gastrik varion sipas llojit të balonit. Zakonisht, baloni gastrik vendoset për një periudhë prej 6 muajsh. Disa balona të reja mund të qëndrojnë për më shumë kohë, madje deri në 12 muaj.
• Miti: Baloni gastrik mund të shpërthejë në stomak
• Fakt: Baloni gastrik është projektuar për të qenë i sigurt dhe monitorohet nga mjeku. Rreziku që një balon gastrik të shpërthejë në stomak është jashtëzakonisht i ulët. Kjo falë teknologjisë së avancuar dhe materialeve që përdoren në prodhimin e tij.